काठमाडौँ । सिंहदरबारको निषेधित क्षेत्रमा भेला भएको भन्दै प्रहरीले जेनजी आन्दोलनका नेता मिराज ढुंगानासहितको समूहलाई मंगलबार दिउँसो हटाएपछि उनीहरूले प्रधानमन्त्री सुशीला कार्कीमाथि तीव्र आलोचना गरेका छन्।
जेनजी समूह सोमबार प्रधानमन्त्रीलाई ध्यानाकर्षणपत्र बुझाउन सिंहदरबार पुगे पनि भेट नपाएको भन्दै मंगलबार पुनः गेटअगाडि जम्मा भएको थियो। भेट नपाएको असन्तोषमा उनीहरूले त्यहीँ बसेर नाराबाजी र आलोचना जारी राखेका थिए।
भीड बढ्दै गएपछि सुरक्षा संवेदनशीलता तथा निषेधाज्ञाको कारण देखाउँदै प्रहरी टोलीले समूहलाई त्यहाँबाट हटाएको काठमाडाैं प्रहरीका प्रवक्ता एसपी पवनकुमार भट्टराईले जानकारी दिए। उनका अनुसार निषेधित क्षेत्रभित्र भीड बढेपछि सबैलाई शान्तिपूर्वक त्यहाँबाट बाहिर निकालिएको हो।
प्रहरीले हटाएपछिपनि जेनजी समूहले प्रधानमन्त्री कार्कीलाई जनतासँग संवाद गर्न नचाहेको आरोप लगाउँदै सामाजिक सञ्जाल र घटनास्थलमै आलोचना जारी राखेको छ।
