झापा । झापाको शिवसताक्षीमा आजदेखि एलभिडी झापा महिला गोल्डकप अन्तर्राष्ट्रिय आमन्त्रण नकआउट फुटबल प्रतियोगिता–२०८२ सुरु हुँदैछ। उद्घाटन खेलमा नेपाल पुलिस क्लबको महिला टिम र चर्च ब्वाइज युनाइटेडबीच प्रतिस्पर्धा हुने भएको छ।
पहिलोपटक आयोजना हुन लागेको झापा महिला गोल्डकप कात्तिक १७ गतेदेखि २४ गतेसम्म शिवसताक्षीस्थित दुधे रंगशालामा हुनेछ। वर्षाका कारण दुई दिन ढिलाइ गर्दै प्रतियोगिता आज (कात्तिक १७ गते) बाट सुरु हुन लागेको हो।
आजको खेलमा पुजा राना, रेखा पौडेल लगायतका राष्ट्रिय महिला फुटबल टिमका चर्चित खेलाडीहरुले समेत खेल प्रदर्शन गर्नेछन् । नेपालकै सर्वाधिक पुरस्कार राशीको महिला फुटबल प्रतियोगिताको रुपमा रहेको यस प्रतियोगितामा दर्शकको उत्साहजनक उपस्थिति हुने आंकलन गरिएको छ ।
आयोजक समितिले तयारी पूरा भएको जनाएको छ। दुधे रंगशालामा तीन हजार दर्शक क्षमताको स्थायी प्यारापिटमा कुर्सी जडान गरिएको छ भने विशेष अतिथिहरूका लागि ३०० वटा सिट निर्माण गरिएको छ। साथै १० हजार दर्शक अट्ने अस्थायी बाँसको प्यारापिट पनि तयार गरिएको आयोजक समिति अध्यक्ष सन्तोष थोप्राले जानकारी दिए। खेलमैदान उत्कृष्ट र आकर्षक रूपमा तयार पारिएको छ।
प्रतियोगिताअन्तर्गत दोस्रो खेल कात्तिक १८ गते नेपाल एपीएफ फुटबल क्लब र भारतको सिक्किमस्थित सिङ्लिङ स्पोर्टिङ क्लबबीच हुनेछ। तेस्रो खेल कात्तिक १९ गते संकटा फुटबल क्लब र झापा फुटबल क्लबबीच हुनेछ भने चौथो खेल कात्तिक २० गते त्रिभुवन आर्मी फुटबल क्लब र आरएस पोखरा फुटबल क्लबबीच हुने तय भएको छ।
पहिलो सेमिफाइनल खेल कात्तिक २१ गते र दोस्रो सेमिफाइनल कात्तिक २२ गते हुनेछ। प्रतियोगिताको फाइनल खेल कात्तिक २४ गते हुनेछ।
गोल्डकपका सचिवालय प्रमुख हिमाल खरेलका अनुसार, यो प्रतियोगिता नेपालमा अहिलेसम्मका महिला फुटबल प्रतियोगितामध्ये सबैभन्दा भव्य र आकर्षक हुने अपेक्षा गरिएको छ।
विजेता टिमले नगद रु. १० लाख १० हजार, उपविजेताले रु. ५ लाख, र सर्वोत्कृष्ट खेलाडीले रु. १ लाख ५० हजार पाउनेछन्।
त्यस्तै, उत्कृष्ट गोलकिपर, डिफेन्डर, मिडफिल्डर, फरवार्ड, उदीयमान खेलाडी, प्रशिक्षक र उच्च गोलकर्तालाई जनही रु. २५ हजार पुरस्कार दिइनेछ। प्रत्येक खेलको प्लेयर अफ द म्याचले रु. १५ हजार र ट्रफी प्राप्त गर्नेछन्।
प्रतियोगितामा कुल ८ टिमको सहभागिता रहनेछ। आयोजक समितिले यो गोल्डकपलाई महिला खेलाडीमा प्रेरणा जगाउने र ग्रासरुट तहमा महिला फुटबललाई सुदृढ बनाउने अभियानका रूपमा लिएको जनाएको छ।
