बिर्तामोड, १ चैत : झापाको बिर्तामोड नगरपालिकाले ४८ जना कृषकलाई कृषि सामग्री वितरण गरेको छ।
नगर प्रमुख पवित्रा महतारा प्रसाईले आज आइतबार आयोजित एक कार्यक्रमबीच कृषकलाई विभिन्न प्रकारका कृषि सामग्री वितरण गर्नुभएको हो।
कृषि शाखाको तथ्याङ्क अनुसार वडा नं. २ का ७ जना, वडा नं. ३ का ३ जना, वडा नं. ६ का १ जना, वडा नं. ७ का १४ जना, वडा नं. ८ का ३ जना, वडा नं. ९ का ७ जना र वडा नं. १० का १३ जना गरी कुल ४८ जना कृषकलाई सामग्री प्रदान गरिएको हो।
प्लास्टिक मल्चिङ २१२ थान, प्लास्टिक टनेल ४० थान, ग्रीन नेट २७ थान, सिलिकन स्टिकर ११० थान, माइक्रो न्यूट्रिएन्ट १३० थान तथा च्याउको बिउ वितरण गरिएको कृषि प्राविधिक सुजित शाहले जानकारी दिनुभयो ।
नगर प्रमुख प्रसाईले कृषकलाई आधुनिक प्रविधि र सामग्रीको प्रयोगमार्फत तरकारी उत्पादन वृद्धि गर्न नगरपालिकाले यस्ता कार्यक्रम हरेक वर्ष सञ्चालन गर्दै आएको बताउनुभयो। उहाँले राज्यले गरेको लगानी खेर जान नदिन वितरण गरिएको सामग्रीको सही सदुपयोग गरी लाभ लिन कृषकहरूलाई आग्रह गर्नुभयो।
नगरपालिकाले उत्पादन वृद्धि, आधुनिक खेती प्रविधिको प्रयोग तथा कृषकको आयआर्जन बढाउने उद्देश्यले विभिन्न कार्यक्रमहरु सञ्चालन गर्दै आएको छ ।
